Арык дөнья шәп талаштан яхшырак
Сатып алынган товарга карата сатып алучының законлы таләпләрен канәгатьләндерергә теләмәгән эшкуарларның берсе шундый фикердә. Эш шунда ки, аңа сыйфатсыз велосипед сатып алган кулланучы язмача дәгъва белән мөрәҗәгать иткән. Йөргән вакытта велосипедның педале гел дә сафтан чыгып торган, шуның нәтиҗәсендә велосипед еш егылган. Сыйфатсыз товарны алмаштыру нияте белән алтынчы мәртәбә телдән мөрәҗәгать итеп караганнан соң кулланучы язмача мөрәҗәгать итеп карарга булган, дәгъвасында ул законнарда билгеләнгән нормаларга да сылтама ясаган.
"Берни дә белергә теләмим, үзең егылган, үзең җимергән! Кит моннан һәм бүтән киләсе булма!" – дигән сүзләр белән сатучы кулланучыны үзенең сәүдә ноктасыннан куып җибәргән. Сатучыны тыңлап туйганнан соң әлеге сюжет герое турыдан-туры судка юл алган... Һәм җиңеп чыккан! "Арык дөнья шәп талаштан яхшырак!" – дими ни диярсең...