Апас районында очрашу
Халыкара инвалидлар көне 2017 елда 3 декабрь көнне билгеләп үтелә. Шуны истә тотып, 2017 елның 28 ноябрендә – Халыкара инвалидлар көне алдыннан, ТР Дәүләт алкоголь инспекциясенең Зеленодол территориаль органы контрольлек-инспекция бүлегенең әйдәп баручы белгеч-эксперты, ТР Пенсия фондының Апас районындагы идарәсе белгече район үзәк китапханәсе методисты катнашында өлкән яшьтәге кешеләр – инвалидлар, хезмәт ветераннары белән очрашу үткәрде.
Очрашуда катнашучыларны сәүдә өлкәсенә бәйле мәсьәләләр кызыксындырды. Территориаль орган белгече җиңел генә формада “яраклылык срогы”, “саклау шартлары” төшенчәләрен аңлатты. Моннан тыш ул кибетнең сәүдә залындагы бәя белешмәлегендә күрсәтелгән товар бәясе кассада сугылган бәягә туры килмәгәндә кулланучының нинди хокукларга ия булуы турында сөйләп үтте. Мондый фактлар асылда федераль челтәрләрнең сәүдә объектларында күзәтелгәли. Ә бу “Кулланучылар хокукларын яклау турында” РФ законының 10 статьясын санга сукмау булып тора. Белгечебез шулай ук кулланучыларның сыйфатсыз товарлар сатып алуга бәйле сорауларына җаваплар бирде.
Очрашу җылы, дустанә рухта узды. Өлкән буын вәкилләре үткәрелгән чарадан бик тә мәмнүн калды. Аларга тематик буклетлар һәм «Вестник потребителя Татарстана» газетасының соңгы саннары таратылды.